11.03.2015 il tarixində  UAFA-ya Amerikalı  Erqoterapiya  mütəxəssisi  Tammi Lenert  təşrif buyurmuş və   inkişaf problemi olan uşaqlar və onların valideynləri üçün erqoterapiyanın  tətbiqinin əhəmiyyəti   barədə fikirlərini  bölüşmüşdür.

Qeyd etmək lazımdır ki, Tammi L. artıq 15 ildir ki, Azərbaycanda fəaliyyət göstərir.  Bu müddət ərzində o, ölkəmizdə bir sıra sosial layihələr həyata keçirməklə yanaşı,  azərbaycan dilində sərbəst danışmağı  da öyrənmişdir.

Müsahibəsində Tammi  xanım  qeyd etdi ki, Azərbaycana yeni gəldiyi illərlə müqayisədə ölkədə hər bir sahədə,  o cümlədən  əlilliyi olan uşaqlar üçün reabilitasiya  xidmətlərinin təşkili  sahəsində nəzərə çarpan dərəcədə  müsbət dəyişikliklər var.  İnkişaf problemi  olan uşaqların valideynlərinin erqoterapiya metodikası ilə tanış olmasının, onların  övladları ilə evdə  məşğul olmaları üçün təlimləndirilməsinin vacibliyini xüsusilə vurğuladı.  Qeyd etdi ki, sosial sahə elə bir sahədir ki, daima təkmilləşdirilməyə ehtiyac  yaranır, hətta Amerikada belə bu sahədə  bəzən çətinliklər  olur. 

Bundan əlavə, Tammi əlilliyi olan uşaqların sosial inteqrasiyasından, bu uşaqlara xidmət göstərən tibb  müəssisələri ilə reabilitasiya mərkəzlərinin əməkdaşlığının vacibliyindən, Azərbaycanda erqoterapiya üzrə mütəxəssislərin hazırlanmasından da danışdı.
Tammi UAFA ilə sıx əməkdaşlıq etdiyini  və bundan sonra da xüsusi qayğıya ehtiyacı olan uşaqların reabilitasiyası istiqamətində  əməkdaşlığı davam etdirəcəyini  bildirdi.